Xəbərlər
MN: Fərrux kəndi və ətraf yüksəkliklərdəki mövqelərdə heç bir dəyişiklik baş verməyib
Azərbaycan ordusunun Fərrux ərəzisindən çıxması barədə Rusiya Müdafiə nazirliyinin yaydığı məlumatdan bir qədər sonra Azərbaycan Müdafiə Nazirliyi bu məlumatı təkzib edib. Nazirliyin martın 27-də yaydığı məlumatda deyilir ki, Azərbaycan Ordusunun Fərrux kəndi və ətraf yüksəskliklərdəki mövqelərində heç bir dəyişiklik baş verməyib.
"Azərbaycan Ordusunun ölkəmizin suveren ərazilərinin tərkib hissəsi olan Fərrux kəndi və ətraf yüksəkliklərdəki mövqelərində heç bir dəyişiklik baş verməyib. Azərbaycan Ordusunun bölmələrinin həmin mövqelərdən geri çəkilməsi haqqında məlumat həqiqəti əks etdirmir. Ordumuz əməliyyat şəraitinə tam nəzarət edir".
Nazirlik həmçinin Rusiya tərəfinin açıqlamasında atəşkəsin guya Azərbaycan tərəfindən pozulması barədə verilmiş məlumatın da həqiqətə uyğun olmadığını və Azərbaycan hərbçiləri arasında yaralanma halı qeydə alınmadğını bildirir.
"Bir daha xatırlatmaq istərdik ki, Azərbaycan ərazisində “Dağlıq Qarabağ” adlı inzibati ərazi vahidi yoxdur. Rusiya Müdafiə nazirliyinin 26 və 27 mart tarixli açıqlamalarında “Dağlıq Qarabağ” ifadəsinin işlədilməsi Azərbaycan Respublikasının beynəlxalq birlik, o cümlədən Rusiya Federasiyası tərəfindən tanınmış və qəbul edilmiş ərazi bütövlüyünə qarşı hörmətsizlikdir"
Müdafiə Nazirliyi Rusiyanın Müdafiə Nazirliyinə xatırlafır ki, fevral ayında Azərbaycanla və Rusiya prezidentləri arasında Mütəfiqlik Bəyannaməsini yara salır.
"Rusiya Federasiyası Müdafiə Nazirliyinə xatırlatmaq istərdik ki, 2022-ci il 22 fevral tarixində iki ölkə prezidentləri tərəfindən imzalanmış Müttəfiqlik qarşılıqlı fəaliyyəti haqqında Bəyannamənin birinci bəndində qeyd olunur ki, “Rusiya Federasiyası və Azərbaycan Respublikası öz münasibətlərini müttəfiqlik qarşılıqlı fəaliyyəti, iki ölkənin müstəqilliyinə, dövlət suverenliyinə, ərazi bütövlüyünə və dövlət sərhədlərinin toxunulmazlığına qarşılıqlı hörmət, eləcə də bir-birinin daxili işlərinə qarışmamaq, hüquq bərabərliyi və qarşılıqlı fayda, mübahisələrin dinc yolla həlli və güc tətbiq etməmək və ya güclə hədələməmək prinsiplərinə sadiqlik əsasında qururlar”.”.
Nazirliyin açıqlamasında daha sonra bəyannamənin 18-ci bəndini də bir daha xatırladılır. Qeyd olunur ki, Rusiya Müdafiə Nazirliyinin bu açıqlamaları Rusiya prezidenti tərəfindən imzalanmış bəyannaməyə hörmətsizlikdir.
"...18-ci bəndinə əsasən, Rusiya Federasiyası və Azərbaycan Respublikası beynəlxalq terrorçuluq, ekstremizm və separatçılıq təhdidlərinə, qarşı mübarizədə və onların neytrallaşdırılmasında səylərini birləşdirirlər. Rusiya Federasiyası Müdafiə Nazirliyi bu açıqlaması ilə eyni zamanda Rusiya Federasiyasının Prezidenti, Rusiya Silahlı Qüvvələrinin Ali baş komandanı Vladimir Vladimiroviç Putin tərəfindən də imzalanmış sözügedən bəyannaməyə də hörmətsizlik nümayiş etdirir"
Müdafiə Nazirliyi bir daha Rusiya Müdafiə nazirliyinə xatırladır ki, Azərbaycanın Xocalı rayonunda "Furux" adlı kənd yoxdur.
"Qeyd edilən kəndin adı FƏRRUXDUR. Ümid edirik ki, növbəti açıqlamalarda kəndin adı düzgün formada göstəriləcəkdir" Azərbaycan Müdafiə Nazirliyinin açıqlamasında vurğulanır.
***
Azərbaycan Fərruxdan öz bölmələrini çıxarıb-Rusiya Müdafiə Nazirliyi
"Danışıqların nəticələrinə əsasən, Azərbaycan tərəfi FURUX (Fərrux -AR.) yaşayış ərazisindən öz bölmələrinin çıxarılmasını həyata keçirib".
Martın 27-də Rusiya Müdafiə Nazirliyinin yaydığı məlumatda belə deyilir.
Nazirliyin məlumatında bir də atəşkəsin iki dəfə Azərbaycan silahlı qüvvələri tərəfindən pozulduğu vurğulanır. Həmçinin qeyd olunur ki, atışma nəticəsində hər iki tərəfdən iki nəfər yaralanıb.
Azərbaycan Müdafiə Nazirliyinin hələkə bu açıqlamaya münasibəti bəlli deyil.
***
"Azərbaycan Respublikası Müdafiə Nazirliyi Rusiya Federasiyası Müdafiə Nazirliyinin 2022-ci il 26 mart tarixli həqiqəti əks etdirməyən və birtərəfli açıqlaması ilə bağlı təəssüfünü bildirir".
Azərbaycanın müdafiə naziriyi Rusiya müdafiə nazirliyinin martın 26-da yaydığı məlumata verdiyi reaksiyada belə deyilir.
Məlumatda martın 25-də iki ölkənin müdafiə nazirləri telefon danışığı zamanı Rusiya sülhməramlı kontingentinin müvəqqəti yerləşdiyi Azərbaycan əraziləri boyunca yaranmış vəziyyət müzakirə edilib. Söhbət zamanı Azərbaycan tərəfi bəyan edib ki, məntəqələrdə mövqelərin və dislokasiya yerlərinin dəqiqləşdirilməsi aparılır.
"Lakin buna baxmayaraq martın 26-sı səhər saatlarında qeyri-qanuni erməni silahlı dəstələrinin üzvləri Azərbaycan Ordusunun bölmələrinə qarşı təxribat törətməyə cəhd göstərib. Dərhal görülən tədbirlər nəticəsində qeyri-qanuni erməni silahlı dəstələrinin üzvləri geri çəkilməyə məcbur edilib".
Müdafiə Nazirliyi bildirir ki, Azərbaycan 2020-ci il 10 noyabr tarixli üçtərəfli bəyanata sadiqdir və onun heç bir müddəasını pozmayıb.
"Təəssüflə qeyd edirik ki, həmin bəyanatın 4-cü bəndinə uyğun olaraq, Ermənistan ordusunun qalıqlarının və qeyri-qanuni erməni silahlı dəstələrinin Azərbaycan ərazilərindən tam olaraq çıxarılması indiyə qədər icra edilməmişdir. Buna görə bəyanatın müddəalarını pozan Azərbaycan deyil, məhz Ermənistandır".
Nazirliyin açıqlamasında bildirir ki, Rusiya Federasiyası Müdafiə Nazirliyinin bu açıqlaması ikitərəfli əlaqələrin mahiyyətinə və 2022-ci il 22 fevral tarixində iki ölkə arasında imzalanmış müttəfiqlik qarşılıqlı fəaliyyəti haqqında Bəyannaməyə ziddir.
Azərbaycan ərazisində “Dağlıq Qarabağ” adlı inzibati ərazi vahidi yoxdur. Açıqlamada qeyd edilən kəndin adı Furux deyil, Fərruxdur".
Nazirlik bildirir ki, "yuxarıda qeyd edilənlərlə əlaqədar Azərbaycan Respublikası Müdafiə Nazirliyi Rusiya Federasiyası Müdafiə Nazirliyini üçtərəfli bəyanatın müddəalarına uyğun olaraq Ermənistan ordusunun qalıqlarının və qeyri-qanuni erməni silahlı dəstələrinin Azərbaycanın beynəlxalq birlik tərəfindən tanınmış ərazilərindən tam olaraq çıxarılmasını təmin etməyi, Azərbaycan silahlı qüvvələrinin ölkəmizin suveren əraziləri daxilində hərəkətini təhrif edilmiş formada qələmə verməməyi, “Dağlıq Qarabağ” ifadəsi işlətməməyi və Azərbaycan ərazilərinin adını düzgün olaraq göstərməyi xahiş edir"-deyə Azərbaycan Müdafiə Nazirliyinin bəyanatında deyilir.
***
Rusiya müdafiə nazirliyinin məlumatından sonra Rusiyanın xarici işlər nazirliyi də tərəfləri təmkinli olmağa çağırıb.
"Biz tərəfləri təmkin nümayiş etdirməyə və mövcud üçtərəfli sazişlərə ən yüksək səviyyədə ciddi əməl olunmasını təmin etməyə çağırırıq"
****
"Martın 24-dən 25-dək Azərbaycan Respublikasının silahlı qüvvələri Rusiya, Azərbaycan və Ermənistan liderlərinin 9 noyabr 2020-ci il tarixli üçtərəfli bəyanatının müddəalarını pozaraq, Rusiya sülhməramlı kontingentinin məsuliyyət zonasına daxil olub. Dağlıq Qarabağ ərazisində müşahidə məntəqəsi qurub. “Bayraktar-TB 2” tipli pilotsuz uçuş aparatı Furux (Fərux-A.) yaşayış məntəqəsi ərazisində Dağlıq Qarabağ silahlı birləşmələrinin bölmələrinə 4 zərbə endirib".
Belə bir məlumat martın 26-da Rusiya Müdafiə Nazirliyinin Qarabağdakı Rusiya sülhməramlı kontingentinin fəaliyyəti haqqında dərc etdiyi bülletenində yer alıb.
Məlumatda deyilir ki, "hazırda Rusiya sülhməramlı kontingentinin komandanlığı vəziyyətin həlli və qoşunların ilkin mövqelərinə qaytarılması üçün tədbirlər görür. Qoşunların çıxarılması üçün Azərbaycan tərəfinə müraciət göndərilib".
Xatırlatma
Qarabağ münaqişəsi müasir mərhələdə 1988-ci ildə başlayıb. Daha sonra Ermənistan və Azərbaycan arasında silahlı toqquşmalar baş verib. 1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi və ona bitişik 7 rayonu işğal edilmişdi. Amma 2020-ci ildə İkinci Qarabağ müharibəsi nəticəsində Azərbaycan Dağlıq Qarabağ bölgəsinin bir hissəsinə və ətraf 7 rayona nəzarəti bərpa edib. Həmin ilin 10 noyabr razılaşmasına (Azərbaycan, Ermənistan və Rusiya arasında) əsasən, döyüşlər dayandırılıb, Laçın dəhlizində və Qarabağda Rusiya sülhməramlıları yerləşdirilib. Keçmiş Dağlıq Qarabağ Muxtar Vilayətinin çox hissəsinin tanınmayan qurumun və Rusiya sülhməramlılarının nəzarətində qaldığı bildirilir.
Bütün xəbərləri izləyin
İran Azərbaycana yeni səfir təyin edib
İranın ISNA xəbər agentliyi yazır ki, İran Xarici İşlər Nazirliyinin (XİN) Avrasiya şöbəsinin baş direktoru Müctəba Dəmirçilu bu ölkənin Azərbaycana yeni səfiri təyin edilib.
Bundan əvvəl İranın Azərbaycandakı səfiri Seyid Abbas Musəvi idi və onun səlahiyyət müddəti 2024-cü ilin martında başa çatmışdı.
İran XİN-in sözçüsü İsmail Bəqayi iyunun 2-də keçirdiyi mətbuat konfransında İranın Azərbaycana yeni səfir təyinatı ilə bağlı sualı cavablandırarkən deyib: "Bizim Mərkəzi Asiya və Qafqaz ölkələri ilə əlaqələrimiz çox həssas və vacibdir. Azərbaycan Respublikasına gəlincə, inzibati proses tamamlanıb, şəxs seçilib. O, təcrübəli və tanınmış diplomat və Avrasiya regionu üzrə ekspertdir".
Xatırlatma
Son zamanlar İran-Azərbaycan diplomatik münasibətlərində yaxınlaşma müşahidə olunur. Apreldə İran prezidenti Məsud Peşezkian Azərbaycana səfər edib.
Ancaq öncəki illərdə Bakı və Tehranın bir-birinin sərhədinə yaxın ərazilərdə hərbi təlimlər keçirməsi qarşılıqlı narazılıqlar doğurub. 2023-cü il yanvarında isə Azərbaycanın Tehrandakı səfirliyinə silahlı hücum nəticəsində səfirliyin əməkdaşları arasında ölən və yaralananlar olub. Bu hücum iki qonşu ölkə arasında münasibətlərin ciddi şəkildə pisləşməsinə səbəb olub. İran bu ilin mayında bildirib ki, Azərbaycan səfirliyinə qarşı törədilmiş ölümcül hücumda təqsirli bilinən şəxs edam edilib.
İstanbulda Rusiya-Ukrayna danışıqları uzun sürmədi
Bu gün, iyunun 2-də İstanbulda Ukrayna və Rusiya nümayəndə heyətləri arasında Ukraynadakı silahlı münaqişəyə son qoyulması ilə bağlı danışıqların yeni raundu keçirilib.
Nümayəndə heyətlərinin görüşü Bakı vaxtı ilə saat 15:40-da, təyin olunduğu vaxtdan saat yarımdan çox gec başlayıb. 17:00-da danışıqların başa çatdığı elan edilib. Beləliklə, danışıqlar saat yarımdan az davam edib.
Türkiyə mediası ölkənin Xarici İşlər Nazirliyinə (XİN) istinadən bildirib ki, görüş "neqativ olmayıb".
Ukrayna prezident ofisinin rəhbəri Andriy Yermak X sosial media hesabında bildirib ki, bugünkü danışıqlarda Ukrayna nümayəndə heyəti Rusiya tərəfinə geri qaytarılmasını tələb etdiyi uşaqların siyahısını təqdim edib.
"Rusiyanın qeyri-qanuni şəkildə deportasiya etdiyi, zorla köçürdüyü və ya müvəqqəti işğal olunmuş ərazilərdə saxladığı yüzlərlə uşaqdan söhbət gedir", –Yermak bildirib.
Yermakın sözlərinə görə, siyahıda yüzlərlə ad var. Onun sözlərinə görə, uşaqların qaytarılması "Rusiyanın niyyətinin səmimiliyinin ilk sınağı" ola bilər.
Bu tələb Ukrayna prezidenti Volodimir Zelenskinin iyunun 1-də açıqladığı üç əsas şərtdən biridir: "Birincisi – tam və qeyd-şərtsiz atəşkəs. İkincisi – əsirlərin azad olunması. Üçüncüsü – oğurlanmış uşaqların geri qaytarılması".
Moskva isə uşaqları müharibədən qorumaq üçün köçürdüyünü iddia edir.
V.Zelenski iyunun 2-də bildirib ki, Rusiya və Ukrayna hərbi əsirlərin mübadiləsinin növbəti mərhələsini də müzakirə edir. O, bu barədə Litvanın paytaxtı Vilnüsdə Mərkəzi Avropa və Şimali Avropa ölkələrinin iştirakı ilə baş tutan sammitdə danışıb.
Mayın 16-da İstanbulda keçirilən danışıqların ilk raundunda tərəflər hərəyə 1000 hərbi əsirin dəyişdirilməsi barədə razılığa gəlib və bu mübadilə ötən ay - mayda başa çatdırılıb.
Ukrayna prezidenti onu da əlavə edib ki, Rusiya və Ukrayna Türkiyənin vasitəsilə müharibənin bitirilməsi üçün öz baxışlarını əks etdirən sənədləri mübadilə ediblər.
+++
Ukrayna ilə Rusiya bütün ağır xəstə hərbi əsirləri və 25 yaşdan kiçik şəxsləri mübadilə etmək barədə razılığa gəliblər. Bunu Ukrayna nümayəndə heyətinin rəhbəri Rustem Umerov danışıqların nəticələrini şərh edərkən bildirib.
"Rusiya atəşkəsə və liderlərin görüşünə razı olmadı. Biz yalnız əsirlərin mübadiləsinə razılaşdıq", - o vurğulayıb.
Ukrayna iyunun 20-dən 30-a kimi yeni görüşün keçirilməsini təklif edib.
15:50
İstanbulda Ukrayna və Rusiya nümayəndə heyətlər arasında görüşün yeni raundu keçirilir.
Görüşü vasitəçi qismində çıxış edən Türkiyənin xarici işlər naziri Hakan Fidan açıb. Türkiyə Xarici İşlər Nazirliyinin X sosial media hesabında onun çıxışı canlı yayımlanıb. Fidanın sözlərinə görə, tərəflər əsirlərin dəyişdirilməsi, mümkün atəşkəs və iki ölkə prezidentlərinin görüşünü müzakirə etməlidirlər.
Nümayəndə heyətləri arasında müzakirələr qapalı qapılar arxasında keçirilir.
Rusiya nümayəndə heyətinin tərkibi mayın 16-da İstanbulda keçirilən danışıqların ilk raundundan fərqlənmir. Heyətə prezident Vladimir Putinin müşaviri Vladimir Medinski rəhbərlik edir. Ukrayna nümayəndə heyətinin tərkibində isə kiçik dəyişiklik olub. Ukrayna nümayəndə heyətinə müdafiə naziri Rustem Umerov rəhbərlik edir. Hər iki heyətdə Xarici İşlər Nazirliyinin nümayəndələri, hərbçilər və xüsusi xidmət orqanlarının təmsilçiləri var.
Ukrayna XİN-in sözçüsü X hesabında bildirib ki, xarici işlər nazirinin birinci müavini Sergiy Kislitsa danışıqlardan əvvəl Ukraynanın avropalı tərəfdaşları - Almaniya, İtaliya və Böyük Britaniyadan olan nümayəndələrlə görüşüb. Görüşdə Ukrayna prezident ofisinin rəhbərinin müşaviri Oleksandr Bevz də iştirak edib.
"Tərəflər Ukrayna və Rusiya nümayəndə heyətləri arasında bugünkü görüşdən əvvəl mövqeləri razılaşdırıblar", - Ukrayna XİN bildirib.
Bugünkü görüşdə tərəflərin münaqişənin sülh yolu ilə həlli prinsipləri və mümkün atəşkəs şərtlərini əhatə edən memorandum layihələrini təqdim etməsi gözlənilir.
Bakıda Elgün İbrahimova görə etiraz aksiyasına cəhd olub
İyunun 1-də Bakıda Gəncə sakini Elgün İbrahimovun müəmmalı ölümünə görə bir qrup fəalın etiraz aksiyasına cəhd göstərdiyi bildirilir.
Bu barədə bəzi fəallar məlumat yayıb.
Onların qeyd etməsinə görə, metronun "28 May" stansiyası ətrafında planlaşdırılan etiraz aksiyasından əvvəl ərazidən keçən bir çox şəxsi polislər saxlayıb, həmin insanları yalnız saatlarla "çək-çevir" etdikdən sonra sərbəst buraxıblar.
Hələlik, məsələyə Daxili İşlər Nazirliyindən (DİN) münasibət almaq mümkün olmayıb.
29 may
Prokurorluq Elgün İbrahimovun hündürlükdən yıxılaraq öldüyünü deyir, amma anası...
Ölümü bütün ölkədə müzakirələrə səbəb olan 18 yaşlı Elgün İbrahimovun hündürlükdən yıxılaraq aldığı xəsarətlər nəticəsində vəfat etdiyinin müəyyən olunduğu bildirilir.
Bu barədə mayın 29-da Baş Prokurorluq və Dövlət Təhlükəsizliyi Xidmətinin birgə məlumatında vurğulanır.
Əlavə edilib ki, cinayət işi üzrə bütün fərziyyələr, onun intihar etməsi, ehtiyatsızlıqdan yıxılması və ya ona ağır bədən xəsarəti yetirilməsi nəticəsində ölümün baş verməsi kimi hallar yoxlanılıb: "... Şahid ifadələri, hadisə yerinə, müşahidə kameralarına baxış, meyitin xarici, daxili müayinə edilməsi, telefon məlumatları, məhkəmə-genetik, məhkəmə-tibbi... ekspertizaların rəyləri və başqa dəlillərlə müəyyən edilib ki, Elgün İbrahimova hər hansı... xəsarət yetirilməyib, ona qarşı heç bir zorakı hərəkətlərə yol verilməyib, o, hündürlükdən yıxılmaq nəticəsində aldığı çoxsaylı xəsarətlərdən ölüb".
Vurğulandığına görə, həmçinin müəyyən edilib ki, E.İbrahimov mayın 12-də saat 16 radələrində hazırlıq kursundan çıxdıqdan sonra mobil telefonunu sataraq ayrı-ayrı şəxslərə olan pul borcunu qaytarıb.
Ana intihar versiyasına inanmır...
Birgə rəsmi açıqlamaya, hələlik, onun yaxınlarından münasibət almaq mümkün olmayıb.
Amma bugünlərdə onun anası Fizzə Zeynalova yerli mediaya açıqlamasında oğlunun intihar edə biləcəyini istisna etmişdi: "Ola bilməz, mənim uşağım həyatdolu uşaq idi. Nəyə görə intihar etməli idi?!", - o, rəsmi açıqlamadan bir gün öncə "TV Müsavat"a müsahibəsində vurğulamışdı.
Yerli mediada mayın 13-nə keçən gecə Gəncə sakini, 18 yaşlı E.İbrahimovun Texnologiya Universitetinə məxsus, hazırda istifadəsiz olan yataqxananın həyətində ağır vəziyyətdə tapılıb xəstəxanaya yerləşdirilsə də, bir neçə saat sonra vəfat etdiyi barədə məlumatlar yayılmışdı. Faktla bağlı cinayət işi açılsa da, sosial şəbəkələrdə işin açılmaması ilə bağlı tənqidlər səslənmişdi.
Polşada prezident seçkisində sağçı Karol Navrotski qalib gəlib
Polşada keçirilmiş prezident seçkilərində müxalifətdən olan sağ-mühafizəkar "Hüquq və Ədalət" partiyasının namizədi Karol Navrotski qalib gəlib. Ölkənin Seçki Komissiyasının ilkin rəsmi məlumatına görə, iyunun 1-də keçirilmiş seçkilərin ikinci turunda səslərin hamısı hesablanıb və K.Navrotski 50.89 faiz səs toplayaraq rəqibi, Varşavanın meri Rafal Tşaskovski üzərində təxminən 400 min səslə üstünlük qazanıb.
Polşanın Milli Yaddaş İnstitutunun keçmiş rəhbəri olan K.Navrotskini səlahiyyət müddəti bitən prezident Andjey Dudanın mənsub olduğu mühafizəkar "Hüquq və Ədalət" partiyası dəstəkləyirdi. Duda ardıcıl iki müddət prezident postunda olub.
K.Navrotski sağçı və millətçi siyasi baxışlara sahibdir və ABŞ prezidenti Donald Trampın siyasətinə simpatiyasını gizlətmir.
2024-cü ilin fevralından Navrotski Rusiyada axtarışdadır. Onun haqqında bu qərar Polşa ərazisində Qızıl Ordu abidələrinin sökülməsi ilə bağlı açılmış cinayət işi çərçivəsində verilib.
Digər namizəd Tşaskovski isə 2018-ci ildən bəri Varşava şəhərinin meri vəzifəsini icra edir, avropayönümlü və liberal siyasətə sadiqdir. Onu namizədliyini hazırkı baş nazir Donald Tuskun rəhbərlik etdiyi "Vətəndaş Koalisiyası" partiyası dəstəkləyirdi.
Mayın 18-də ölkədə keçirilmiş seçkinin birinci turunda Tşaskovski səslərin 31.4 faizini toplayaraq Navrotskini 2 faizdən az fərqlə qabaqlamışdı.
Damın uçması nəticəsində xəsarət alan məhkum vəfat edib
İyunun 1-də 12 saylı Cəzaçəkmə Müəssisəsinin damının uçması nəticəsində xəsarət alan məhkum vəfat edib.
Bu barədə Ədliyyə Nazirliyi məlumat yayıb.
Məsələyə, hələlik, adıçəkilən məhkumun yaxınlarının münasibəti bəlli deyil.
1 iyun
Bakıda cəza evinin dam örtüyü uçub
İyunun 1-də saat 13:10-da Azərbaycandakı 12 saylı Cəzaçəkmə Müəssisənin məhkumlar üçün nəzərdə tutulmuş yaşayış binasının dam örtüyünün uçduğu, nəticədə bir nəfər məhkumun xəsarət aldığı bildirilir.
Bu haqda ölkənin bir sıra saytlarına Ədliyyə Nazirliyinin mətbuat xidməti məlumat verib.
Vurğulandığına görə, müəssisədə cəza çəkən digər məhkumlar və işçi heyəti arasında xəsarət alan olmayıb.
Həmin müəssisə Bakının Qaradağ rayonu Qızıldaş qəsəbəsində yerləşir.
Azərbaycandakı bir sıra həbsxanalarda həm ümumilikdə saxlanma şəraiti, həm verilən qida, həm də məhbusların hüquqları ilə bağlı tez-tez şikayətlər eşidilir. Amma Penitensiar Xidmətin məsul şəxsləri bununla bağlı tənqidləri qəbul etmirlər.
PSJ-nin qələbəsi sonrası iğtişaşlarda iki nəfər ölüb
Parisin "Pari Sen-Jermen" futbol klubunun UEFA Çempionlar Liqasındakı qələbəsindən sonra Fransada baş verən iğtişaşlarda azı iki nəfər ölüb, 192 nəfər yaralanıb.
Fransanın TF1 telekanalı məlumat verib ki, ölkənin cənub-şərqindəki Daks şəhərində sinəsindən bıçaq zərbəsi alan 17 yaşlı oğlan həyatını itirib. Qətldə şübhəli bilinən şəxs hadisə yerindən qaçıb. Parisin 15-ci dairəsində isə skuter sürən 20 yaşlı qızı azarkeşləri daşıyan avtomobil vurub.
TF1 kanalının yayımladığı videolarda yandırılmış avtomobillər, polislə toqquşan və mağazaları talayan insan kütlələri görünür. Fransanın daxili işlər naziri Brüno Ritello qarətçiləri "vəhşilər" adlandırıb.
Fransa Daxili İşlər Nazirliyinin məlumatına görə, törədilən vandalizm və iğtişaşlarla əlaqədar ölkə üzrə 559 nəfər saxlanılıb, onların 450-yə yaxını Parisdədir.
Saleh Səmədov həbs edilib
İmişli rayon Ağsaqqallar Şurasının keçmiş sədri Saleh Səmədov həbs edilib.
Mayın 31-də məhkəmənin qərarı ilə onun haqqında 4 aylıq həbs-qətimkan tədbiri seçilib. Yerli saytların məlumatında onun Cinayət Məcəlləsinin 179-cu (Mənimsəmə və ya israf etmə) maddəsi ilə ittiham olunduğu bildirilir.
Bu məlumata, hələlik, müdafiə tərəfindən münasibət almaq mümkün olmayıb. Mayın 13-də S.Səmədov İmişli rayon Ağsaqqallar Şurasının sədri vəzifəsindən də azad edilmişdi.
13 may
YAP üzvü 'Georgi lenti' və SSRİ bayrağına görə vəzifədən çıxarılıb
İmişli rayon Ağsaqqallar Şurasının sədri Saleh Səmədov "Georgi lenti" və SSRİ bayrağına görə vəzifədən çıxarılıb.
Bu barədə qərar mayın 13-də Azərbaycan Ağsaqqallar Şurası İdarə Heyətinin növbədənkənar iclasında verilib. Bu qurum bununla bağlı məlumatı da artıq öz saytında yayıb.
Məlumata görə, qurumun sədri Eldar Quliyev iclasda təəssüflə vurğulayıb ki, faşizm üzərində Qələbə günü münasibətilə mayın 9-da İmişlinin Sarıxanlı kəndində keçirilən tədbirdə S.Səmədov "SSRİ bayrağı altında", sinəsində "rus imperiyasının rəmzi" olan "Georgi lenti" ilə çıxış edib.
Əlavə edilib ki, müzakirələrdən sonra S.Səmədovun İmişli rayon Ağsaqqallar Şurasının sədri vəzifəsindən, o cümlədən Azərbaycan Ağsaqqallar Şurasının üzvlüyündən çıxarılması barədə qərar qəbul olunub.
S.Səmədovun hakim Yeni Azərbaycan Partiyasının (YAP) da üzvü olduğu bildirilir.
Modern.az-a açıqlamasında Milli Məclisin deputatı, YAP Təftiş Komissiyasının üzvü Elman Nəsirov deyib ki, İmişlidə baş verən bu hadisəni pisləyir: "...İstisna deyil ki, məsələyə dair Yeni Azərbaycan Partiyasının rəhbər orqanlarından olan Təftiş Komissiyası qiymət verə bilər".
Hələlik, qərara və tənqidlərə S.Səmədovun özündən ayrılıqda münasibət almaq mümkün olmayıb.
Amma o, yerli saytlara məsələ ilə bağlı fikirlərini bölüşüb. Həmin tədbir zamanı meydanda başqa bayraqların da olduğuna diqqət çəkən S.Səmədov sonra da vurğulayıb ki, "Azərbaycan bayrağı bizim hər zaman başımızın üstündədir".
Xatırlatma
Azərbaycan Ağsaqqallar Şurası SSRİ dönəmində, 1989-cu ildə təsis edilib. 1990-cı ildə isə dövlət qeydiyyatından keçərək rəsmi fəaliyyətə başlayıb. Şuranın ilk sədri Azərbaycan SSR Kommunist Partiyası Mərkəzi Komitəsinin keçmiş birinci katibi, akademik İmam Mustafayev olub.
Bu təşkilat Azərbaycan müstəqilliyinə qovuşduqdan sonra da fəaliyyətini davam etdirib. Təşkilata İ.Mustafayevdən sonra akademik Budaq Budaqov, deputat Fəttah Heydərov da rəhbərlik edib. Hazırda onun sədri keçmiş deputat, Azərbaycan Mərkəzi Kooperativlər İttifaqının (Azərittifaq) sədri, Kooperasiya Universitetinin rektoru Eldar Quliyevdir.
Növbədənkənar sessiyanın ilkin gündəliyi açıqlanıb
Milli Məclisin növbədənkənar sessiyası çərçivəsində ilk iclası iyunun 3-də keçiriləcək.
Bu barədə Milli Məclisin Mətbuat və ictimaiyyətlə əlaqələr şöbəsindən xəbər verilib.
İclasın gündəliyinə ilk məsələ kimi "2024-cü il dövlət büdcəsinin icrası haqqında" qanunun layihəsi (birinci oxunuş) daxil edilib.
Habelə bir sıra məcəllə və qanunlara dəyişiklik nəzərdə tutulur.
Gündəlikdə ümumilikdə, hələlik, 7 məsələnin olduğu bildirilir.
Milli Məclisin növbədənkənar sessiyası keçiriləcək
Milli Məclisin növbədənkənar sessiyası keçiriləcək. Bunu Milli Məclisin bu gün, mayın 30-da yaz sessiyası çərçivəsində son iclasında parlamentin sədri Sahibə Qafarova bildirib.
Spiker deyib ki, Milli Məclisin iyunda növbədənkənar sessiyası keçiriləcək: "85 deputat növbədənkənar sessiyanın çağırılması üçün müraciət edib".
İclasda növbədənkənar sessiyanın keçirilməsinin motivi ilə bağlı məlumat verilməyib. Bu barədə deputatlar da mediaya, hələlik, açıqlama verməyiblər.
Ötən il növbədənkənar sessiyada olanlar...
Azərbaycanda bundan əvvəl də bir çox illərdə Milli Məclisin növbədənkənar sessiyaları keçirilib. Ötən il də bu, baş vermişdi. Onda dövlət büdcəsinə və bir çox qanunlara dəyişiklik edilmişdi. Növbədənkənar sessiyada büdcənin gəlir və xərcləri artırılmışdı.
Habelə parlamentin iyunun 21-də keçirilən iclasında (növbədənkənar sessiyanın davamı olaraq) Milli Məclis növbədənkənar seçkilərin təyin edilməsi üçün prezidentə müraciət etmişdi. Ondan bir gün əvvəl isə hakim Yeni Azərbaycan Partiyası (YAP) Milli Məclisin buraxılması təşəbbüsü ilə çıxış etmişdi. YAP-dan belə bir təşəbbüsü zəruri edən amil kimi həmin ilin noyabrında ölkədə keçiriləcək BMT iqlim konfransı (COP29) və başqa tədbirlər göstərilmişdi. Vurğulanmışdı ki, Konstitusiyaya əsasən, konfransın gerçəkləşəcəyi vaxtda - 2024-cü ilin noyabrında Milli Məclisə növbəti seçkilər keçirilməlidir. "Həm seçkilərin, həm də qeyd olunan tədbirlərin yüksək səviyyədə təşkili mühüm əhəmiyyət kəsb edir. Bundan əlavə, həmin dövrdə ölkə parlamentinin tam fəaliyyətdə olmasının məqsədəmüvafiqliyi də nəzərə alınmalıdır", - YAP-ın sədr müavini-Mərkəzi Aparatın rəhbəri Tahir Budaqov demişdi.
Rusiyaya gedənlər əvvəlcə elektron ərizə doldurmalı olacaq
İyunun 30-dan etibarən Rusiya ərazisinə vizasız qaydada daxil olan xarici ölkə vətəndaşları və vətəndaşlığı olmayan şəxslər planlaşdırılan səfər tarixindən ən azı üç gün əvvəl xüsusi elektron ərizə forması doldurmalı olacaq. Rusiya Daxili İşlər Nazirliyinin nümayəndəsi İrina Volkun sözlərinə görə, bu yenilik ölkəyə giriş prosedurunu əvvəlcədən nəzarətə almaq və miqrasiya prosesini tənzimləmək məqsədi daşıyır.
O deyib ki, bu tədbirlər Rusiyaya giriş-çıxış qaydaları və şərtlərini sınaqdan keçirmək üçün tətbiq olunan eksperimentin ikinci mərhələsidir.
Bu tələb fəaliyyət qabiliyyəti olmayan şəxslərin və ya yetkinlik yaşına çatmayanların qanuni təmsilçilərinə də şamil edilir.
Əgər Rusiya Federasiyasına təcili daxilolmanı tələb edən hallar mövcuddursa (məsələn, təcili tibbi müalicə, ağır xəstəlik və ya yaxın qohumun vəfatı), elektron ərizənin ölkəyə girişdən azı 4 saat əvvəl təqdim olunmasına icazə veriləcək.
Elektron ərizənin "RuID" adlı mobil tətbiq vasitəsilə doldurulması nəzərdə tutulur. Bu tətbiqdə istifadəçinin rəqəmsal profili yaradılacaq.
Daxili İşlər Nazirliyinin nümayəndəsi bildirib ki, bu rəqəmsal profil xaricdən gələnlər üçün dövlət xidmətlərindən istifadə prosesini asanlaşdıracaq və Rusiya ərazisinə girişə qoyulan mümkün qadağalar haqqında öncədən məlumat almağa imkan verəcək.
Dövlət Duması daha əvvəl Moskva şəhəri və Moskva vilayətində miqrantlarla bağlı rəqəmsal nəzarət üzrə qanun qəbul edib. Bu qanuna əsasən, xarici vətəndaşlar xüsusi mobil tətbiqdə qeydiyyatdan keçməli və şəxsi məlumatlarının qeydiyyatına razılıq verməlidirlər. Buna mobil telefon məlumatları və coğrafi yerləşmə (geolokasiya) da daxildir.
Bundan əlavə, miqrantlar olduqları ünvanda qeydiyyatdan keçməli, barmaq izi verməli və fotoşəkil çəkdirməlidirlər.
Əgər miqrant yaşayış yerini dəyişərsə, bu barədə üç iş günü ərzində Rusiya Daxili İşlər Nazirliyinə məlumat vermək öhdəliyi daşıyır.
Araşdırma: Ötən il 407 min nəfər Rusiya ordusu ilə müqavilə imzalayıb
2024-cü ildə Rusiya Müdafiə Nazirliyi ilə təxminən 407 min nəfər müqavilə imzalayıb.
"iStories" saytı yazır ki, jurnalistlər Rusiyanın ötənilki federal büdcə xərclərinə dair məlumatların təhlili əsasında bu nəticəyə gəliblər.
Araşdırmalar yayımlayan sayt qeyd edib ki, 2024-cü ildə orduya cəlb olunanların sayına dair maksimal qiymətləndirmə 407.2 min, minimal isə 374,2 min nəfər təşkil edir. Bu fərq 2024-cü ilin avqustunda Rusiya prezidenti Vladimir Putinin orduda xidmət üzrə müqavilə bağlayanlara verilən federal ödənişi 195 min rubldan 400 min rubla (5 min 80 dollar) qaldırması ilə izah olunur. Məhz bu dəyişiklik 2024-cü ilin üçüncü rübü üzrə müqaviləli hərbçi sayını dəqiq hesablamağı çətinləşdirir.
2024-cü ilin son rübündə orta hesabla gündə 1 min 700 nəfər müqavilə imzalayıb. Bu göstərici 2023-cü ilin eyni dövrü ilə müqayisədə 1.3 dəfə azdır.
2025-ci ilin yazında müqavilə imzalayanların sayı azalmağa davam edib. Almaniya Beynəlxalq Münasibətlər və Təhlükəsizlik İnstitutunun (SWP) əməkdaşı Yanis Klüqenin hesablamalarına görə, hazırda gündə orta hesabla 1 min nəfər müqavilə imzalayır. Halbuki prezident Vladimir Putin 2025-ci ilin yayına qədər bu göstəricinin gündə 1 min 800 nəfərə çatacağını iddia etmişdi.
"Conflict Intelligence Team" (CIT) qrupunun hərbi ekspertləri Putinin ayda 50-60 min yeni kontraktlı hərbçi barədə açıqlamasını "tamamilə siyasi xarakterli" hesab edirlər: "Bu, kontekstdən də açıq görünür: o deyir ki, "Ukraynada hazırda 30 min nəfəri tutub cəbhəyə göndərirlər, bizdə isə bundan iki dəfə çox könüllü gəlir". Sadəcə olaraq, (Ukraynaya) belə bir mesaj vermək istəyir: bizdə daha çox canlı qüvvə var, müqavimət göstərməyin, biz sizə kütlə ilə qalib gələcəyik. Əslində isə bu miqyasda səfərbərlik və ya müqavilə bağlayanların sayını görmürük".
CIT ekspertlərinin açıqlamasına görə, belə bir artım yalnız kontrakt üçün birdəfəlik ödənişlərin kəskin artırılması ilə mümkündür. İndiyə qədər bütün sürətli artım məhz bu cür maddi stimullar nəticəsində baş verib. Məsələn, 2024-cü ilin avqustunda Putin federal ödənişi artırmış və regionlara da yeni müqaviləli hərbçilərə azı 400 min rubl ödəməyi tövsiyə etmişdi. Eyni hal Yeni il ərəfəsində ödənişlərdəki artım kampaniyası zamanı da baş vermişdi. Amma 2025-ci ilin yazında ödənişlərdə belə artım müşahidə olunmayıb.
2024-cü ilin sonunda Rusiya müdafiə naziri Andrey Belousov bildirib ki, ötən bir il ərzində 427 min nəfər Rusiya ordusunda xidmət etmək üçün müqavilə imzalayıb.
Nazir ABŞ rəsmisini qəbul edib
Mayın 30-da Azərbaycan xarici işlər naziri Ceyhun Bayramov ABŞ dövlət katibinin Avropa və Avrasiya məsələləri üzrə köməkçisinin müavini Coşua Hakı qəbul edib.
Xarici İşlər Nazirliyinin (XİN) məlumatına görə, görüşdə əməkdaşlıq məsələləri, habelə Azərbaycan və Ermənistan arasında normallaşma prosesinin cari vəziyyəti müzakirə olunub: "Görüş zamanı bölgədə enerji layihələri, alternativ enerji üzrə planlar, nəqliyyat və kommunikasiya xətlərinin perspektivləri, Mərkəzi Asiya ilə birgə əməkdaşlıq fəaliyyəti nəzərdən keçirilib".
Rəsmi Bakının ötən ilin sonlarına qədər Qərb ölkələri, xüsusilə də ABŞ ilə münasibətlərində ayrı-ayrı vaxtlarda gərginlik müşahidə edilib.
ABŞ rəsmiləri, bir qayda olaraq, Azərbaycanda fundamental azadlıqlar və tənqidçilərin həbsi ilə bağlı narahatlıqlarını ifadə ediblər. Azərbaycan rəsmiləri isə belə çağırışları ölkənin daxili işlərinə qarışmaq kimi dəyərləndiriblər.
Lakin ötən ilin noyabrında ikinci dönəm ABŞ prezidenti seçilən Donald Trampin bu ilin yanvarında vəzifəsinin icrasına başlaması ilə rəsmi Bakıdan iki ölkənin əməkdaşlığı ilə bağlı xoş mesajlar səslənməyə başlayıb.
ABŞ dövlət katibinin təmsilçisi Ermənistana səfər edib
Yerevana səfəri çərçivəsində ABŞ Dövlət Departamentinin yüksəkrütbəli nümayəndəsi mayın 29-da Ermənistan rəsmiləri ilə keçirdiyi görüşlərdə ikitərəfli əlaqələri və Ermənistan-Azərbaycan danışıqlar prosesini müzakirə edib.
ABŞ dövlət katibinin Avropa və Avrasiya məsələləri üzrə köməkçisinin müavini Coşua Hak bildirib ki, o, xarici işlər naziri Ararat Mirzoyan ilə "yaxşı görüş" keçirib və bu görüşdə "ABŞ-Ermənistan arasında inkişaf edən tərəfdaşlıq və sülh sahəsində irəliləyiş" müzakirə olunub.
"Ermənistanla güclü əlaqələr bütün vətəndaşlarımız üçün daha böyük rifah yaradır", - o, ABŞ-nin Yerevandakı səfirliyinin yaydığı qısa bəyanatda qeyd edib.
Ermənistan Xarici İşlər Nazirliyinin (XİN) danışıqlarla bağlı yaydığı açıqlamada isə bildirilib ki, tərəflər Ermənistanın dayanıqlılığını gücləndirmək və konkret nəticələr əldə etməyə yönəlmiş birgə addımları müzakirə ediblər.
Görüşdə regional təhlükəsizlik də əsas müzakirə mövzularından biri olub. Mirzoyan martda mətni yekunlaşdırılmış Ermənistan-Azərbaycan sülh sazişi vasitəsilə regionda sülhün bərqərar olunması üçün real imkanın olduğunu bildirib. Nazirliyin açıqlamasına görə, Mirzoyan və Hak sülh gündəliyinin həyata keçirilməsi ilə bağlı davam edən səylər barədə fikir mübadiləsi aparıblar, lakin əlavə təfərrüat verilməyib.
Ermənistan Təhlükəsizlik Şurasının katibi Armen Qriqoryan da C.Hak ilə ayrıca keçirdiyi görüşdə sülh sazişinin imzalanmasının vacibliyini vurğulayıb.
Xatırlatma
Ötən əsrin 80-ci illərində Qarabağ münaqişəsi Azərbaycan və Ermənistan arasında hərbi toqquşmalara səbəb olmuş, rəsmi Bakı ölkənin 20 faiz ərazilərinə nəzarəti itirmişdi. Lakin 2020-ci il 44 günlük savaş və 2023-cü ildə qısa həbi əməliyyatlarla Bakı bütün ölkədə suverenliyini bərpa edib. Son illər Azərbaycan və Ermənistan arasında sülh danışıqları yenidən güclənib, tərəflər bütün müddəaların razılaşdıqlarını açıqlayıblar, amma, hələlik, sülh sazişi imzalanmayıb.
Əli Kərimlinin inzibati qaydada həbs edilən sürücüsünə cinayət işi açılıb
Azərbaycan Xalq Cəbhəsi Partiyasının (AXCP) sədri Əli Kərimliyə sürücülük edən və aprelin əvvəlində inzibati qaydada həbs olunan Zaur Rzalı ilə bağlı cinayət işinin açıldığı bildirilir. O, Cinayət Məcəlləsinin 228.5 (Qanunsuz olaraq qaz silahını, soyuq silahı, o cümlədən soyuq atıcı silahı əldə etmə, satma və ya gəzdirmə,...) maddəsi ilə ittiham olunur. Bu barədə AXCP-dən məlumat verilib.
Partiyadan vurğulandığına görə, bununla bağlı onun özünə mayın 29-da dəvət olunduğu Nərimanov rayon Polis İdarəsində məlumat veriblər.
"Cinayət işinin başlanmasına formal səbəb Z.Rzalının avtomobilindən məişətdə istifadə etdiyi meyvə bıçağının tapılmasıdır", - AXCP-dən vurğulanıb.
Z.Rzalı aprelin 1-də Nərimanov rayon Məhkəməsində 30 sutka həbs edilmişdi. O, İnzibati Xətalar Məcəlləsinin 510 (xırda xuliqanlıq) və 535.1-ci (Polis işçisi və ya hərbi qulluqçu ictimai qaydanın mühafizə vəzifələrini icra edərkən onların qanuni tələblərinə qəsdən tabe olmamaq) maddələri ilə təqsirli sayılıb. Partiyadan onun şərləndiyi açıqlamışdı.
AXCP-nin məlumatına görə, Z.Rzalı onlara bildirib ki, həmin vaxt onu saxlayanda maşınında axtarış aparıblar, meyvə bıçağını götürüblər: "Deməsinə görə, 17-ci polis bölməsində maşınında axtarış aparılanda "bardaçok"dakı bıçağı götürüblər, nə üçün olduğunu soruşublar. O, da Sədərək Ticarət Mərkəzindən 10 il bundan qabaq aldığını, sırf məişətdə istifadə üçün olduğunu deyib. Bildirib ki, meyvəçidir, tez-tez rayonlarda olur və bıçaq onun üçün vacib əşyadır".
AXCP hesab edir ki, hadisənin üstündən iki aya yaxın vaxt keçəndən sonra bıçağın yenidən yada düşməsi cinayət işinin siyasi sifarişlə açıldığını deməyə əsas verir.
Z.Rzalı sərbəst buraxılsa da, ölkədən çıxışına qadağa qoyulduğu bildirilir.
AXCP sədri Əli Kərimli isə bir müddət öncə vurğulamışdı ki, son iki ayda ona ictimai əsaslarla sürücülük və mühafizəçilik edən səkkiz şəxs əsassız yerə həbs edilib.
Hələlik, bütün bu açıqlamalara rəsmi qurumlardan münasibət almaq mümkün olmayıb.
Xatırlatma
Müxalifətdə olan AXCP-nin hazırda 15-ə yaxın üzvü uzunmüddətli həbsdədir. Üstəlik, bir çox fəalları inzibati qaydada həbs edilib. Onlar müxtəlif ittihamlarla üzləşsələr də, partiya onların hamısının siyasi sifarişlə həbs edildiyini açıqlayıb. Azərbaycan rəsmiləri isə ölkədə siyasi məhbus olması ilə bağlı deyilənləri qəbul etmirlər. Onlar vurğulayırlar ki, siyasi məhbus siyahısında yer alan şəxslər sırf törətdikləri əmələ görə mühakimə ediliblər.
Bəzi hüquq müdafiəçilərinin hesablamalarına görə, hazırda Azərbaycanda 360-dan çox siyasi məhbus var.
Hökumət Ayxan İsrafilovun hüququnun pozulduğunu tanıyıb
Mayın 28-də Avropa İnsan Hüquqları Məhkəməsi (AİHM) "İşçi Masası" Həmkarlar İttifaqları Konfederasiyası İdarə Heyətinin üzvü Ayxan İsrafilovun şikayəti ilə bağlı qərar çıxarıb.
Vəkil Fariz Namazlı bildirib ki, bu şikayət A.İsrafilov barəsində 2023-cü il avqustun 23-də seçilmiş həbs-qətimkan tədbirinin qanunsuzluğu ilə bağlı olub. Onun bildirməsinə görə, şikayətdə Avropa Konvensiyanın 5-ci (Azadlıq və toxunulmazlıq hüququ) maddəsinin pozuntusunun tanınması xahiş olunurdu. F.Namazlı deyib ki, bu iş üzrə hökumət birtərəfli bəyanat qəbul edib və hüquq pozuntusunu etiraf edib.
AİHM bu işi nəticədə siyahıdan çıxarıb.
Məhkəmə mənəvi zərərin əvəzi olaraq 2 min 700 avro, məhkəmə xərclərinə görə 450 avro kompensasiya müəyyən edib.
Hələlik, qərara Azərbaycanın rəsmi qurumları münasibət bildirməyib.
Qərar icra olunacaqmı?
Bu ilin aprelində prezident İlham Əliyev bildirmişdi ki, artıq AİHM-in qərarları Azərbaycana şamil edilə bilməz. O, ADA Universitetində "Yeni dünya nizamına doğru" adlı forumdakı çıxışında bununla bağlı fikirləri Azərbaycan nümayəndə heyətinin ötən il Avropa Şurası Parlamentlər Assambleyasında (AŞPA) mandatının təsdiqlənməməsi haqda suala cavab verərkən səsləndirmişdi: "Nəzərə alsaq ki, biz Avropa İnsan Hüquqları Məhkəməsinin hakimlərinin seçilməsində iştirak etmirik, buna görə həmin məhkəmənin qərarları bizim üçün hər hansı bir qüvvəyə malik deyil. Bu bizim mövqeyimizdir".
AŞPA ötən il yanvarın 24-də Azərbaycanın Avropa Şurasına üzvlükdən irəli gələn əsas öhdəliklərini yerinə yetirməməsini əsas gətirərək bu ölkənin deputatlarının etimadnamələrini təsdiqləməyib. Əsaslar kimi Azərbaycanda insan hüquqlarının vəziyyətinin pisləşməsi, jurnalistlərin həbsi, növbədənkənar prezident seçkisini müşahidə etmək üçün quruma dəvət göndərilməməsi, habelə Qarabağda hərbi əməliyyatlar göstərilib.
Assambleyada səsvermədən əvvəl qurumda iştirakını "qeyri-müəyyən müddətə" dayandıran Azərbaycan nümayəndə heyəti vurğulamışdı ki, baş verənlər ölkələrinin ərazi bütövlüyünü bərpa etməsinə görə aparılan qərəzli kampaniyanın bir hissəsidir.
Xatırlatma
A.İsrafilov 2023-cü ilin avqustunda saxlanılıb. O, Cinayət Məcəlləsinin 234.1-1-ci (narkotik vasitələri saxlama və yayma) maddəsi ilə ötən il aprelin 2-də Bakı Ağır Cinayətlər Məhkəməsində 3 il müddətinə azadlıqdan məhrum edilib. A.İsrafilov ittihamı qəbul etmir.
2022-ci ildə yaradılan "İşçi Masası" Həmkarlar İttifaqları Konfederasiyasının dörd üzvü – sədr Afiəddin Məmmədov, üzvləri Ayxan İsrafilov, Elvin Mustafayev və Möhyəddin Orucov hazırda həbsdədir. Onlar müxtəlif ittihamlarla üzləşsələr də, ittihamların hamısını qurama, siyasi sayırlar.
Abxaziyada Azərbaycan və Türkiyə vətəndaşları saxlanılıb
Tanınmamış Abxaziya Respublikasının Qali rayonunda Azərbaycan və Türkiyə vətəndaşları saxlanılıb.
Abxaziya Dövlət Təhlükəsizliyi Xidmətinin məlumatına görə, qurum Rusiya Federal Təhlükəsizlik Xidmətinin (FSB) Sərhəd İdarəsi ilə birgə "dövlət sərhədinin qanunsuz keçilməsi" kanalını aşkarlayıb və iki qrup xarici vətəndaşı saxlayıb.
"Birinci qrupda iki Türkiyə vətəndaşı var: 1997-ci il təvəllüdlü Selçuk Güren – o, Türkiyə ərazisində törədilmiş sifarişli qətl hadisəsinə görə İnterpol xətti ilə beynəlxalq axtarışa verilib - və 2001-ci il təvəllüdlü Doğan Bersan – o da qətl törətmək və narkotik vasitələrin ticarətinə görə axtarışdadır", —məlumatda bildirilir.
Tanınmamış respublikanın müvafiq qurumunun mayın 26-da yaydığı məlumata görə, Azərbaycan vətəndaşları - 1974-cü il təvəllüdlü Həsən Əzizov və 1990-cı il təvəllüdlü Namaz Təhməzli də saxlanılıb.
Abxaziyanın Dövlət Təhlükəsizliyi Xidmətinin məlumatına görə, onlar "Gürcüstanda cinayət məsuliyyətindən yayınmaq üçün Abxaziyada gizlənməyə cəhd ediblər".
Qeyd olunub ki, saxlanılan şəxslər barəsində Cinayət Məcəlləsinin 324-cü maddəsinin 2-ci bəndi (sərhədin qanunsuz keçilməsi — əvvəlcədən əlbir olan şəxslər qrupu və ya mütəşəkkil dəstə tərəfindən törədildikdə) üzrə cinayət işi qaldırılıb.
Tbilisi xarici vətəndaşların Abxaziyada saxlanılması ilə bağlı şərh verməyib.
ABŞ çinli tələbələr üçün vizaları ləğv edəcək
ABŞ dövlət katibi Marko Rubio mayın 28-də elan edib ki, ABŞ Çin Kommunist Partiyası ilə əlaqəsi olan və kritik sahələrdə təhsil alanlar da daxil olmaqla çinli tələbələrin vizalarını "qətiyyətlə" ləğv etməyə başlayacaq. Bu barədə ABŞ Dövlət Departamentinin saytında onun adından dərc olunan bəyanatda deyilir.
Rubio bəyanatında bildirib ki, Dövlət Departamenti Çindən və Honq Konqdan olan gələcək bütün viza müraciətlərinə nəzarəti gücləndirmək üçün viza meyarlarını da yenidən nəzərdən keçirəcək.
"ABŞ Dövlət Departamenti çinli tələbələrin vizalarının ləğvini qətiyyətlə həyata keçirmək üçün Daxili Təhlükəsizlik Nazirliyi ilə birgə işləyəcək", — o bildirib.
Vaşinqtondakı Çin səfirliyi məsələ ilə bağlı şərh verməyib.
Tramp administrasiyasının Harvard Universitetinin əksəriyyəti çinli olan xarici tələbələri qəbul etmək imkanını məhdudlaşdırmasının ardınca Çinin Xarici İşlər Nazirliyi xaricdəki çinli tələbələrin qanuni hüquq və maraqlarını qəti şəkildə qoruyacağını bəyan etmişdi.
"Reuters" yazır ki, əgər bu qərar ABŞ-də təhsil alan yüz minlərlə çinli tələbənin geniş bir hissəsinə şamil olunsa, bu, Amerika universitetləri üçün mühüm gəlir mənbəyinə və ABŞ texnologiya şirkətləri üçün vacib olan istedadlı işçi qüvvəsi axınına təsir edə bilər.
Rubionun bəyanatında vizaların ləğvinin hansı miqyasda olacağı ilə bağlı ətraflı məlumat verilməyib. Lakin nisbətən az sayda tələbəyə şamil edilməsi belə, Çindən ABŞ-yə ali təhsil almaq üçün gələn çinli tələbələrin axınına təsir göstərə bilər.
Son onilliklər ərzində ABŞ Çinin son dərəcə rəqabətli universitet sisteminə alternativ axtaran və Amerika universitetlərinin güclü reputasiyasına cəlb olunan çoxsaylı çinli tələbələr üçün əsas seçimə çevrilib. Həmin tələbələr, adətən, ABŞ universitetlərinin yüksək təhsil haqqını ödəyə bilən varlı ailələrdən gəlirlər.
Bir çox analitiklər hazırkı ABŞ-Çin geosiyasi rəqabətini Soyuq müharibənin yeni forması kimi qiymətləndirir. ABŞ-nin müvafiq qurumları və Konqres Çin hökumətinin maliyyələşdirdiyi təsir fəaliyyətləri və texnologiyalarla bağlı Amerika universitetlərində nəzarəti gücləndirib.
Trampın birinci prezidentliyi dövründə ozamankı dövlət katibi Mayk Pompeo ABŞ universitet kampuslarında Çin hökumətinin maliyyələşdirdiyi Konfutsi İnstitutunun mədəniyyət mərkəzlərinin ləğvi təşəbbüsünə rəhbərlik edib. O bildirib ki, bu mərkəzlər Çinin qlobal təbliğatını və "zərərli" təsirini yaymaq və "casuslar və əməkdaşlar cəlb etmək" məqsədinə xidmət edir.
